CEBU - Usa ka polis nga nagbantay sa checkpoint ang naangol ug giingong nabalian og tuhod human usa ka pribadong sakyanan ang misungag sa ilang gikahimutangan sa Gov. Cuenco Avenue sa barangay Banilad ning dakbayan sa miaging gabii.
Si PO1 Wilbur Uy, 26, taga Tres de Abril St. barangay Labangon ang naangol sa pagbangga sa sakyanan nga gimaneho ni Bonnie Booc, 29, nga taga Tambo Kawit lungsod sa Medellin.
Base sa imbestigasyon sa kapolisan nagpahigayon og checkpoint ang Criminal Intelligence and Investigation Branch sa Cebu City Police Office sa maong dapit kontra motorcycle riding criminals ug mga tulisan dihang nahitabo ang aksidente.
Usa ka sakyanang Ford Everest nga gimaneho ni Booc nga nagtangag og plakang YCY-200 ang kalit nga midasmag sa gihimutangan ni Uy hinungdan sa pagkaangol niini.
Si Uy gidala sa Chong Hua Hospital samtang boluntaryong mitahan si Booc sa kapolisan, samtang wala matino kung hubog ang suspek niadtong tungura.
Giandam na ang kasong Reckless Imprudence Resulting to Physical Injuries batok sa suspek. - BANAT NEWS