CEBU - Gilaslasan og budget ang duha ka buhatan sa dakbayan sa Talisay lakip na ang buhatan sa bise mayor sa dakbayan sa Talisay sa giaprobahang P377 milyones nga annual budget alang sa tuig 2009 atol sa special session kagahapon.
Gilaslasan ang budget sa consultancy nga ubos sa buhatan ni Bise Mayor Lani Abarquez gikan sa P2 milyones gihimo na lang kining P600 mil.
Samtang ang budget sa Legislative Research and Codification nga P3.5 milyones gilaslasan gikan P2 milyones gihimo nalang kining P1.5 milyones.
Si Bise Mayor Lani Abarquez sa pakighinabi niini sa mga tigbalita kagahapon sa buntag nagkanayon nga ang P3.4 milyones nga nakaltas gikan sa budget sa consultancy ug LRC igahin alang sa pagpaayo sa mga guba nga mga edipisyo sa tunghaan ug pagpatukod og mga lawak saringan.
Gibutyag ni Abarquez nga dili gihapon magamit ang P600 mil nga budget tungod kay dili kini makapaigo.
Kahinumduman usab nga sa milabay'ng sesyon si Bas ang misugyot nga i-adjourn ang nahisgutang sesyon tungod kay nasagmuyo kini dihang si Konsehal Shirley Belleza ug Abarquez misupak nga ang budget sa Liberation ug Charter Day igahin nalang sa pagpatukod og mga lawak saringan sa Barangay Tanke, samtang sa gisugyot ni Bas, gusto niini nga ang budget sa consultancy igahin sa nahuna-hunaan niyang proyekto.
Apan ang maong sugyot ni Bas ang gibabagan ni Konsehal Alan Bucao. - Brenda Batuto (BANAT NEWS)