CEBU - Gisugdan na sa Lihok Filipina Foundation, Bantay Banay, ug sa Cebu City Women and Family Affairs Commission ang “18 Day Campaign To End Violence Against Women”.
Giklaro hinoon sa coordinator sa maong kalihukan nga si Lisa Tumulak nga dunay rason ang pagtakdo sa 18 ka adlaw nilang kampanya.
Gibuksan ang kalihukan niadtong miaging adlaw dungan sa paghandom sa nahitabo niadtong 1968 sa Dominican Republic diin tulo ka babaye ang gimasaker.
Karong Disyembre 1 mao usab ang pagtamod sa World AIDS Day diin sagad sa daling mataptan sa nahisgutang sakit mao ang kababayen-an.
Unya sa Disyembre 6 handumon usab sa grupo ang nahitabong masaker didto sa Canada diin ubay-ubay nga kababayen-ang estudyante ang gimasaker.
Kini dihang ang nahisgutang mga tinun-an mikuha og kursong engineering nga gikasuko usab sa mga tinun-ang lalake.
Samtang sa umaabot nga Disyembre 10 mao usab ang pagsaulog sa International Human Rights Day nga gipakigbisugan usab sa kababayen-an.
Matud ni Tumulak nga tak-opan ang ilang kampanya unya sa Disyembre 12 atol usab sa pagtamod sa Anti-Trafficking in Persons Day.
Miingon si Tumulak nga lakip sa mga kalihukan nga ilang himoon sulod sa 18 ka adlaw nga kampanya mao ang film showing labot sa “human trafficking” ug uban pa.
Labaw sa tanan mao ang pagpahigayon og orientation sa nagkadaiyang kabarangayan sa dakbayan labot sa Akta Republika 9208 kon ang Anti-Trafficking in Persons Act of 2003. – BANAT NEWS