CEBU - Usa ka gipasanginlang notadong tulisan ug ex-convict gibuk-an sa iyang ulo samtang nahinanok pagkatulog daplin sa dalan niadtong Domingo sa alas 10:30 sa gabii diha sa Abellana St., barangay Suba ning dakbayan.
Ang biktima giila sa kapulisan nga si Francisco Gonzalez 25, “alias Kimbo” namatay pipila ka oras paghidangat sa Cebu City Medical Center (CCMC) human makaangkon og samad pinusilan sa likod sa iyang ulo ug walang bahin sa lawas.
Samtang ang nag-inusarang mamumuno gihulagway nga nagsul-ob og itom nga t-shirt, nagpurol, 5”4” ang gitas-on kasarangan ang panglawas ingon man pamanit yano rang nilakaw palayo sa dapit.
Sa imbestigasyon nilang PO3 Geoffrey Gutual sa Homicide Section sa Cebu City Police Office (CCPO) gikatahong natulog na ang biktimang si Gonzales niadtong tungura ug wala makabantay sa pag-abot sa maong mamumuno kinsa midul-it og pusil sa iyang ulo.
Ang biktima gidali unta pagdala sa CCMC sa mga tanod sa Suba sakay sa service vehicle sa barangay apan namatay kini pipila ka oras.
Nakuha sa crime ang usa ka slug sa wala pa matinong kalibre sa armas ingon man ang usa ka metal fragment.
Si Cebu City Police Office Chief Sr. Supt. Patrocinio Comendador, mikunpirmar nga nga nagsulod-gawas ang biktima sa bilanggoan gumikan sa kasong pagpanulis.
Ilaha usab susihon kung may kalambigitan ba kini sa pagpusil sa tanod sa Lorega-San Miguel nga si Mariano Calbario tungod kay milutaw ang pangalan niini human sa maong hitabo.
Samtang si Supt. Paul Labra II ang Deputy City Director sa CCPO maoy usa sa misuse karon sa maong impormasyon tungod kay si Gonzales gikatahong usa sa mga tulisang anha magburduhan sa gipusilan sa maong tanod. (BANAT NEWS)