CEBU - Gisaka sa balay ug gidunggab makadaghang higayun ang usa ka dalaga nga nahinanok og katulog diha sa barangay San Vicente lungsod sa Liloan niadtong Domingo sa alas 2:00 sa kaadlawon.
Ang biktima mao si Mercilyn Camiguin, 30, molupyo sa nahisgutang lugar samtang ang suspek wala pa gyud mailhi sa kapulisan sa paghimo ning balita daling nakaikyas.
Matud ni PO3 Jaime Maroliña sa Liloan Police dihang nahinabi sa Banat News nisekreto og sulod sa balay ang suspek pinaagi sa pagguba sa unom ka blade sa bintana.
Dihang nakasulod na gipugos niini og abli ang siradora sa lawak sa biktima ug pagkahuman gidunggab kini sa nagkadaiyang parte sa lawas.
Tungod sa kasikas nakamata ang 5-anyos nga pag-umangkon sa biktima ug misinggit sa kahadlok hinungdan nga mikaratel og ikyas ang mamumuno.
Ang biktima gideretso sa tambalanan dinhi sa dakbayan sa Sugbo ug naa sa kritikal ang kahimtang samtang gisubay pa sa kapolisan kung unsay motibo sa krimen. (BANAT NEWS)