CEBU - Giawhag ni Konsehal Augustus Pe Jr. ang kapolisan sa dakbayan nga hingusgan pa ang pagpahigayon og mga checkpoints taliwala sa nahitabo sa usa ka barangay tanod sa Lorega-San Miguel nga napusilan sa dihang mikuyog sa mga polis sa susamang operasyon.
Matud ni Pe nga nagkaduol na ang panahon sa Pasko ug gipaabot nga mosaka usab ang nagkadaiyang matang sa krimen niining panahuna.
Apan mipahimangno si Pe nga dili usab mahimo nga duha o tulo lang ka polis ang mopahigayon og checkpoints sa usa ka dapit.
Ang konsehal nga maoy chairman sa Committee on Public Order and Safety sa City Council dili buot nga masundan pa ang nahitabo kang Mariano Calbario kinsa napusilan sa walang bahin sa dughan.
Si Calbario uban sa duha ka polis sa Pari-an police station mibutang og checkpoint diha sa eskina sa mga dalan Echavez ug Lorega niadtong miaging kaadlawon.
Apan sa dihang ilang gipahunong ang usa ka jeep de pasaheroan gikan sa Talamban aron unta susihon ang kalalakin-an kalit nga gipusil sa duha ka mga lalaking pasaherong nanganaog si Calbario.
Dako ang pagtuo sa kapolisan nga mga tulisan ang duha ug naratol sa maong checkpoint.
Tungod kay pipila lang ka polis ang diha sa checkpoint yano lang usab nga nakasibat ang suspetsado maong gusto ni Pe nga daghan gyud unta ang mga polis o ba kaha mga tanod sa diha sa usa ka checkpoint ug dili mokumpiyansa. – BANAT NEWS