CEBU - Patay nang nadangat sa Carcar District Hospital ang usa ka traysikad driver human masaghiri sa naghaguros nga Ceres Bus Liner ug nalagpot pipila ka metros sa dalan kagahapon sa alas 4:57 sa kaadlawon diha sa sitio Lagang, barangay Ocaña dakbayan sa Carcar.
Si SPO1 Joel Pananganan sa Carcar Police Station nga nahinabi sa Banat News miila sa biktima nga si Ricky Abonero, 47, nagpuyo sa nahisgutang lugar apan lumad nga taga Bohol.
Samtang ang nakadasmag nga boluntaryong nitahan sa kapolisan mao si Lito Ortega, 45, taga sitio Awayan, Poblacion 3 sa nahisgutang dakbayan driver sa Ceres bus nagtangag sa plakang BYZ 1O7.
Matud pa ni SPO1 Pananganan nga ang biktimang si Abonero, paingon unta sa Poblacion samtang ang bus nagsunod kaniya gikan sa Oslob paingon sa dakbayan sa Sugbu.
Gikatahong pag-abot sa may sitio Lagang barangay Ocaña kalit lang ni-overtake ang bus nga gimaneho ni Ortega, apan matud pa nga naapiki ug nagkuwang sa karkulo nasaghiran sa luyong bahin sa bus ang traysikad.
Hinungdan nga nalimbuwad ang traysikad ug ang biktimang si Abonero sa kakusog sa impact nalagpot ug didto mapantok ang ulo sa aspaltadong karsada.
Gidali unta kini nila sa pagdala sa tambalanan apan gideklarar kini sa mga doktor nga patay nang nadangat kanila.
Ang drayber nga si Ortega nitahan gilayon sa kapulisan sa dakbayan sa Carcar ug ning pagsulat nagpahigayon pa sa negosasyon ang kabanay ingon man ang driver alang na sa amicable settlement. - BANAT NEWS