CEBU - Napakyas sa pagpahigayon sa ilang regular session ang konseho sa Consolacion niadtong miaging Miyerkules tungod kay wala sila makorum.
Nasayran nga wala manambong ang ubang mga konsehal nga maoy nakaaghat kang Bise Mayor Ember Alinsug sa pagpahigayon og special session niadtong Biyernes.
Tungod sa kapakyas paghimo og sesyon, napakyas usab ang giandam nga privilege speech ni Konsehal Alfred Francis “Alfie” Ouano.
Ang maong privilege speech ni Ouano naglambigit unta kini sa kontrobersiyal nga isyu kalabot sa panag-engkuwentro ni Mayor Avelino Gungob Sr. ug Department of Environment and Natural Resources (DENR) 7.
Si Ouano kinsa maoy presidente sa pederasyon sa mga konsehal sa lalawigan sa Sugbo ug naglingkod isip ex-officio nga sakop sa hunta probinsiyal mao untay motanyag sa iyang kaugalingon nga mahimong tulay aron masulbad ang maong kakulian.
Matud pa ni Ouano nga iyang gisuportahan si Mayor Gungob sa gipatuman nga mga proyekto niini nga gitumong alang sa kalamboan sa lungsod ug mahinungdanon kaayo ang pagsulbad sa mga kakulian nga nasinati niini.
Si Gungob kinsa gipakgang sa gihimo niining pagguba sa kabukiran tungod sa siyam ka kilometro niyang dalan nga proyekto sa barangay Danlag ug barangay Lanipga gidudahan nga nalambigit usab sa ilegal nga palusot og anapog. Si Bise Mayor Ember Alinsug nga nahinabi sa Banat News miingon nga labing unang higayon pa nga nahitabo sa konseho sa Consolacion nga napakyas sa pagpahigayon og regular session. – BANAT NEWS