CEBU - Dunay tensiyon karon tali sa mga vendors diha sa dalan M.C. Briones ning siyudad sa Sugbu ug sa mga opisyal sa barangay Santo Niño human sa nahitabong kagubot sa milabay’ng Sabado ug gipaabot nga mausab kini karong adlawa.
Kini tungod kay gipahibawo sa Cebu Market Vendors Development Cooperative (Cemvedco) nga ilang ipadayon ang pagtukod og mga stalls diha sa maong dapit.
Niadtong miaging adlaw, hapit mahitabo ang lamok-lamok dihang kusganong gibabagan sa mga opisyal sa Santo Niño ang tinguha sa mga manindahay.
Nikalma lang ang duha ka habig dihang niabot ang mga polis human usab mangayo og assistance ang mga barangay official sa Santo Niño.
Apan matud sa chairman sa Cemvedco nga si Erwin Goc-ong nga karong adlawa ila nang ipadayon ang pagtukod sa mga stalls diha sa nahisgutang lugar.
“Mobalik gyud mi dili man na sa ingon nga bag-o mi diha, nipahawa lang akong mga sakop tungod kay dunay drainage nga gitrabaho ba,” sumala ni Goc-ong.
Gitataw hinuon sa barangay kapitan sa Santo Niño, Pancho Ramirez Sr., nga subli usab nilang pugngan ang mga vendors pagtukod og mga structures.
“Og mamugos sila, aw, ato na sab nga babagan, pugngan gyud nato kay wa man gud sila’y ikapakita nato nga papel,” matud ni Ramirez.
Gipasalig hinuon ni Goc-ong nga niining tungura sila armado na og written consent nga iyang pangayoon gikan kang City administrator Bimbo Fernandez.
Wala kapugngi ni Goc-ong ang pagbasol kang Ramirez tungod kay ang kapitan giingong wala mubabag atol sa ilang katapusang panagtigom.
“Sa final meeting namo diha man siya unya wa man siya mo-manifest og pagsupak unya dihang motukod na mi gibabagan niya,” nagkanayon si Goc-ong.
Nangatarungan hinuon si Ramirez nga wala siya hatagi og higayon nga makasulti ug wala na lang usab siya mamugos nga makatingog niadtong higayuna.
“Nagpaabot lang gyud ko nga makatingog unya wala man ko katingog, illegal man gyud nang structures daplin sa karsada,” matud ni Ramirez.
Kapin sa 40 ka mga vendors boluntaryong niguba sa ilang mga structures dihang gitrabaho ang drainage project sa City Hall ug karong nahuman na ang maong proyekto buot sa mga manindahay nga mobalik sigon sa ilang nasabutan tali sa mga opisyal sa siyudad. - Elly Bolonos (BANAT NEWS)