CEBU - Nasagmuyo ang mga bag-ong sakop sa Presidential Anti Smuggling Group (PASG) 7 kay wala sila binli og mga kagamitan sa ilang buhatan sa gipulihan nilang mga sakop sa PASG.
Matud pa ni MSgt. Alexander Santos ang OIC karon sa PASG-7 nga gihimulbolan gyud ang ilang opisina sa mga lamesa, lingkuranan, aircon, ug bisan ang logo sa PASG gipapas pinaagi sa pintal nga puti ug ang mga salamin nangabuak.
Gumikan niini naglaraw ang mga bag-ong sakop sa PASG nga ilang ipaabot ngadto kang PASG Secretary Ramon “Bebot” Villar kining maong kaso.
Giangkon usab ni MSgt. Santos nga hangtod karon wala pa sila makasugod sa ilang gimbuhaton gumikan kay kuwang sila og mga tawo.
Sa pagkakaron ang mga sakop sa armadong kusog maoy naglangkob sa mga elemento sa PASG human ma-recall ang tanang mga sakop sa PNP nga naglakip kang kanhi PASG-7 Director Supt. Ariel Falcuto. - Bong Soriano (BANAT NEWS)