CEBU - Usa ka ulitawong guwang nga giingong wala na makaantos sa iyang sakit nga hubak naghikog-patay pinaagi sa paglaslas sa iyang walang pulso ginamit ang buak nga bildo niadtong Biyernes sa alas 7:00 sa buntag sa sitio Pandan, barangay Mahawak lungsod sa Medellin.
Ang nagpakamatay giila sa kapulisan nga si Loreto Rosatase, 65, nagpuyo sa nahisgutang dapit ang napalgan sa iyang mga kabanay nga patay na sulod sa iyang panimalay.
Si PO3 Paquito Son sa Medellin Police Station nga nahinabi sa Banat News nagkanayon nga ang biktima nagbuy-od sa balay ug wala nay kinabuhi’ng nagtupad pa sa buak nga bildo.
Sumala pa niini nga sa paghiling ni Doctor Royland Momongan ang Rural Health Officer sa nahisgutang lungsod walay laing nakitang samad o bun-og sa patay’ng lawas niini gawas lang sa samad nilaslasan sa walang pulso agi sa bildong buak.
Dugang nakuhang impormasyon sa kapulisan nga ang nagpakamatay nga si Rosatase, gikatahong nisuway na kini niadto sa paghunos sa iyang kinabuhi tungod sa pagsigi’g atake sa iyang sakit nga hubak.
Apan niadtong Biyernes sa buntag nilampos kini sa iyang laraw sa paghunos sa iyang kaugalingong kinabuhi samtang wala diha ang mga kabanay. - Guam Logroño (BANAT NEWS)