CEBU - Gi-insister ni Talisay City Mayor Socrates Fernandez nga legal ang iyang pagkatudlo kang Romeo Tabañag isip labaw sa Office of the Senior Cetizens Affairs kon OSCA sa dakbayan sa Talisay.
Si Mayor Fernandez nibutyag dihang na-interview sa Bantay Radyo nga andam usab niyang atubangon ang reklamo nga giduso ni kanhi Konsehal Severino Tabasa ngadto sa Ombudsman Visayas nga nagkwestiyon sa legalidad sa iyang pagtudlo ni Tabañag.
Gibutyag ni Fernandez nga isip mayor sa dakbayan duna siya’y gahom kon appointing authority sa nominees nga gi-aprobahan sa konseho aron maoy mangulo sa OSCA.
Gipasabot sa mayor nga wala siya’y nahimong kalapasan sa iyang pagtudlo kang Tabañag gumikan kay sama kang Tabasa pulos man kini mga nominado sa maong posisyon nga gi-aprobahan sa konseho.
Gibutyag sa mayor nga nagselos lang si Tabasa tungod kay apil man kini sa mga nominees sa maong posisyon apan wala niya mapili nga matudlo isip labaw sa OSCA.
Apan si Tabasa nipadayag nga walay resolusyon nga gi-aprobahan gikan sa konseho ang pagkatudlo kang Tabañag subay sa reklamo niining gisang-at sa Ombudsman nga naghulagway nga nakahimo og grave abuse of authority, conduct of unbecoming of a public official ug uban pa ang mayor sa pagtudlo niini kang Tabañag isip labaw sa OSCA.
Si Tabañag subay sa appointment nga gipirmahan ni Mayor Fernandez magdawatan og P120 mil matag tuig nga suholan. – BANAT NEWS