CEBU - Magtutudlo sa Talisay City National High School kinsa gipasanginlang mibuwad sa iyang mga estudyante tungod kay wala makadala og botelya sa supplemental drink mibahad nga mopasaka og kaso batok sa mga ginikanan sa duha niya ka estudyante tungod sa pagdangop niini ngadto sa media kabahin sa maong insidente.
Si Teodoro “Balo” Belleza, kapitan sa barangay Poblacion sa pakighinabi niini sa Banat News kagahapon sa buntag mibutyag nga si Sweetheart Tayong magtutudlo sa first year sa maong tunghaan uban sa ilang guidance counselor nga si Royjean Cerilla mianha sa iyang buhatan niadtong Lunes sa hapon.
Kini aron mangayo og “certificate to file action” tungod kay buot niining pasakaan og kasong harassment, moral damages ug libel ang magtiayong Virginia ug Dominador Cañeda, mga ginikanan sa usa ka bata nga giingong gibuwad sa init.
Matud ni Belleza nga gipatawag niya ang magtiayong Cañeda diin miuban usab ang usa ka Amelita Saraosad nga inahan sa laing bata nga apil sa gibuwad.
Buot sa kapitan nga mahusay ang maong problema diha sa iyang barangay apan si Tayong ang buot mosang-at og reklamo ngadto sa korte ang nahisgutang problema.
Tungod niini, matud pang Belleza misumbalik usab og bahad ang mga ginikanan sa mga bata nga pasakaan og kaso si Tayong tungod sa giingong pagbuwad niini ngadto sa init sa ilang mga anak ug ang giingong wala niini pagklase tungod lang niini.
Si Belleza midugang nga nagpagama siya og laing schedule sa husay tali sa mga ginikanan ug kang Tayong karong Disyembre 1, 2008 sa pamasin nga dunay posibilidad nga mag-uli lang ang mga kabubot-on sa maong mga ginikanan ug sa maong maestra.
Nagsugod ang kontrobersya human pipila sa kapin 50 ka mga bata ang misumbong sa ilang mga ginikanan ug na-interbyu pa sa media kabahin sa pagpangabuso sa ilang maestra kanila usa ka semana na ang nakalabay. Gikatahong gibuwad sila sa maong magtutudlo tungod kay wala sila makadala sa basiyo sa botelya sa usa ka lokal nga food supplement nga iapil sa maong tunghaan sa pa-contest.
Kini gipanghimakak hinuon sa maong magtutudlo. – BANAT NEWS