CEBU - Kun diha sa Reclamation area sa dakbayan sa Mandaue adunay mga “cartoon girls”, ang dakbayan sa Talisay karon gikatahong adunay “jackstone girls” nga anha mag-estambay sa south coastal road.
Si Konsehal Shirley Belleza tsirman sa komitiba sa Kababayen-an, Kabataan ug Pamilya sa pakighinabi niini sa Banat News kagahapon nagkanayon nga sa gipahigayong tigum sa Provincial Women’s Council sa milabay’ng semana nakadawat siya og komento kabahin sa giingong “jackstone girls”.
Matud niini nga wala siya’y nabantayan nga mga jackstone girls apan hinuon adunay ilang nabantayan nga mga batan-ong babaye nga nagtrabaho diha sa sa mga imnanan nga nahimutang sa sitio Kalmar,barangay Lawaan I.
Kahinumduman nga sa milabay’ng mga buwan gikataho nga adunay mga babaye nga mag-atang diha sa lugar nga giingong magpabayad og P100 sa tulo ka lalaki bugti sa lawasnong serbisyo apan hangtod karon ang maong problema padayon pa gihapon.
Matud ni Belleza nga aduna nay mga reklamo nga naabot diha sa iyang buhatan nga duna nay nangatakdan og sexually transmitted disease (STD).
Sa laing bahin, si Sr. Insp. Jovito Canlapan, officer in charge sa Talisay City Police Station sa pakighinabi niini sa Banat News kagahapon nagkanayon nga atol sa department head meeting niadtong Lunes nahisgutan ang “jackstone girls.” Mipahigayon na hinuon sila og pagpaniid apan ang ilang makit-an mga batan-on nga mga babaye ug lalaki nga mag-estambay diha South Coastal Road tunga-tunga sa dakbayan sa Talisay ug Sugbu. – BANAT NEWS