CEBU - Dako ang kahigayonan nga mahitabo ang panag-engkuwentro ni kanhi Mayor Thadeo Ouano ug kanhi Board Member Gabriel Luis Quisumbing alang sa pagka -kongresista sa ikaunom nga distrito sa lalawigan sa Sugbo karong umaabot nga piniliay sa 2010.
Kini ang nasayran sa Banat News kang Antero “Jun” Caña, tigpamaba ni kanhi Mayor Ouano dihang nahinabi kagahapon.
Matud pa niya nga daw nagkahayag na ang kahigayonan nga mokandidato si kanhi Mayor Ouano alang sa pagka kongresista sa ikaunom nga distrito sa 2010 sanglit nagkadaghan man usab karon ang nagduso kaniya.
Si Caña miingon nga si 6th District Representative Nerissa Soon-Ruiz nga anaa na sa iyang katapusang termino isip kongresista sa ikaunom nga distrito mao usab ang kandidato alang sa pagka -mayor sa dakbayan sa Mandaue sa grupo nila ni Ouano ug maoy mosakbang kang Mayor Jonas Cortes sa pagpasubli niini sa katungdanan.
Gipasabot ni Caña nga daghan og giplano nga kalamboan si Ouano alang sa ikaunom nga distrito nga naglakip sa lungsod sa Cordova nga haum kaayo alang sa kalambuang pangturismo.
Dugang pa niya nga ang mga nahimong kalamboan ni Ouano sa dakbayan sa Mandaue sa iyang administrasyon kaniadto dako og kahigayonang mokaylap sa tibuok distrito nga maglakip sa Consolacion aron palambuon usab sa maong lungsod ang mga industriya nga anaa sama sa dakbayan sa Mandaue.
Giangkon ni Caña nga si Quisumbing kinsa kanhi board member sa Sugbo usa usab ka lig-on nga kandidato sa pagka kongresista sa ikaunom nga distrito ug hayan mao kini ang ikasakbang ni Ouano kana kun wala motagam sa naangkon niining kapildihan batok ni Kongresita Soon-Ruiz niadtong 2004 election. – BANAT NEWS