CEBU - Irekomendar ni Cebu City Hall Education Consultant Joy Augustus Young nga tangtangan og mga allowances sa siyudad ang mga magtutudlo sa Emilio Osmeña Integrated School diha sa barangay Buot-Taup.
Kini samtang nagpadayon pa ang imbestigasyon sa Cebu City Schools Division batok sa mga magtutudlo diha sa nahisgutang tunghaan.
Ang mga magtutudlo gireklamo sa mga ginikanan sa mga tinun-an ug sa mga barangay officials ngadto kang Young pipila ka semana na ang nakalabay tungod kay giingong sayo nga mamuhi sa ilang klase matag Biyernes ug dugay usab motunga sa ilang classroom matag adlaw nga Lunes.
Gani nasuta ang kamatuuran niini sa gipahigayong imbestigasyon ni Febelyn Bendolo ang district supervisor sa maong tunghaan.
Sa giduso ni Bendolo nga report ngadto sa Cebu City Schools Division, upat ka mga magtutudlo sa Emilio Osmeña ang nasuta nga sayong namauli niadtong Oktobre 17.
Kini mao sila si Rose Cortes, Cristina Pugoy, Mae Ylaya ug Yeda Rosero nga gipatubag na usab sa ilang principal nga si Floreiphine Navarro.
Apan dili pa mapaham-tangan og tukmang silot ang nahisgutang mga magtutudlo tungod usab sa ka taas sa proseso nga sundon sa Department of Education (DepEd).
Ang City government maghatagan matag buwan og P250 ngadto sa P750 nga hardship allowance sa mga magtutudlo sa bukirang mga barangay sa siyudad nga wala didto magpuyo.
Samtang laing P250 usab nga COLA matag buwan ang ihatag sa Local School Board nga gipanguluhan ni Mayor Tomas Osmeña.
“Dili na ko makapaabot anang imbestigasyon sa DepEd nga posibleng maabtan pa og siyam-siyam, bahala na sila, but as far as the City is concerned, ang akong buhaton mao ang pagrekomendar nga dili sila kadawat sa hardship allowance ug COLA,” matud ni Young. – BANAT NEWS