CEBU - Pagbalik sa kontrobersyal nga kanhi Agriculture secretary sa nasud nga si Jocelyn “Jocjoc” Bolante usa ka paagi aron malimpyuhan ug aron mahayagan ang tanan kabahin sa isyu sa fertilizer scam sumala pa ni kanhi 3rd district representative Jun Yapha.
Si Yapha kinsa usa sa mga nakontrobersyal kaniadto tungod sa fertilizer fund sa interview sa usa ka sibyaanan nagkanayon nga sa pag-imbestigar unya ni Bolante mahibaw-an na si kinsang mga kongresista dinhi sa Sugbu ang mabistong nakapahimulos sa fertilizer fund.
Matud sa kanhi Kongresista nga dili lang kay siya ra kundili daghang mga distrito dinhi sa Sugbu ang nakabenepisyo sa maong fertilizer fund, kahinumduman nga nasentro sad sa kontrobersya si Yapha dihang nasuta nga ang mga incorporators sa foundation nga gigamit sa pagpatuman sa maong proyekto gilangkoban sa iyang mga staff ug driver.
Nidugang si Yapha nga walay anomaliya ang iyang proyekto kaniadto apan mas maayo kung moabot si Bolante aron maklaro ang maong isyu ug malimpiyohan ang iyang pangan.
Samtang ang kanhi regional director sa Department of Agriculture dinhi sa Central Visayas nga si Eduardo Lecciones kinsa usa sab nipatuman sa maong proyekto sama ni Yapha mihangop sa pagbalik ni Bolante.
Matud ni Lecciones matubag na ang daghang mga pangutana kaniadto may labot sa maong kontrobersya.
Bisan paman niini kung dunay ablihan nga laing imbestigasyon, nagkanayon si Lecciones nga angayan lang gihapong manubag si Bolante ug mopasabot diin mapunta ang P700 milyones nga fertilizer fund.
Dunay mga alegasyong gigamit kini sa pagpangampanya sa eleksyon niadtong 2004 alang sa kandidatura ni Presidente Gloria Arroyo. (BANAT NEWS)