CEBU - Misangpot sa pagkasikop sa usa ka jailguard ug hinigugma niining minyo sa dihang miresponde ang Provincial Intelligence Bureau (PIB) sa Cebu Provincial Police Office (CPPO) sa usa ka kidnap-for-ransom incident.
Nasikop si Prison Guard I Rogelio Hatamosa, 41, taga barangay Garing, Consolacion ug nadestino isip jailguard sa Cebu Provincial Detention and Rehabilitation Center (CPDRC) kauban ang hinigugma niining 26-anyos nga si Levi (tinuod nga ngalan gipugngan) diha sa eskina Magallanes ug V. Gullas kagahapon sa buntag.
Si CPPO director Sr. Supt. Carmelo Valmoria miasoy sa mga tigbalita nga sila si Hatamosa ug Levi nagtinabangay aron sa pag-ilad sa bana ni Levi nga si Al Inoc, 35, usa ka seaman nga taga barangay Casili, Consolacion.
Sumala pa sa imbestigasyon nga si Inoc nangayo og tabang sa PIB human ang kapikas niining si Levi mipadala kaniya og text messages nga gi-kidnap siya ug gipangayoan og P100 mil sa mga kidnapper.
Niadtong Sabado, si Inoc uban ni Levi ug anak niini nga nangaligo og dagat sa wala pa mahitabo ang giingong pagkawala ni Levi sa dihang nagbayad kini sa bill sa kuryente sa usa ka mall sa dakbayan sa Sugbo.
Gawas sa text messages nga gipadala ni Levi, nanawag usab kini sa telepono ug nagpahibalo sa iyang bana nga midemanda ang mga kidnapper og P100 mil.
Gitun-an sa mga elemento sa PIB ang sitwasyon hangtod nga giplano nila ang paglit-ag sa giingon nga mga kidnapper ni Levi.
Kagahapon sa alas 10 sa buntag, ilusad unta ang entrapment operation sa usa ka tindahan nga nahimutang sa eskina Magallanes ug V. Gullas. Dala sa mga sakop sa PIB ang salapi nga gidemanda sa giingong mga kidnapper ni Levi.
Apan sa pag-abot ni Inoc ug sa mga polis sa tindahan, nasugat sa ilang panan-aw ang tawo nga nag-uniporme nga nailhang si PG1 Hatamosa kauban ang asawa ni Inoc nga si Levi.
Gisikop si PG1 Hatamosa ug si Levi. Si Hatamosa gidisarmahan sa iyang .45 kalibre nga service pistol.
Si Sr. Supt. Valmoria nagkanayon nga kasong robbery with intimidation ang ipasaka batok ni PG1 Hatamosa ug Levi human desididong mopasaka og kaso si Inoc.
“Way kidnapping kun dili ‘kidnap me’ stage lang ang scenario nga gihimo sa asawa ug sa jailguard,” si Valmoria nagkanayon.
Ang mga tigbalita misulay pagkuha sa habig nilang PG1 Hatamosa ug ni Levi, apan nagdumili kini sa pagtingog. Samtang si Inoc nagdumili usab sa pagtubag sa mga pangutana sa mga sakop sa media.
Silang PG1 Hatamosa ug Levi gitanggong karon sa buhatan sa PIB samtang gihikay pa ang kaso nga ipasaka batok nila. (BANAT NEWS)