Mga kahugpungan sa nagkadaiyang vendor’s association sa lalawigan naglaraw nga ituboy pagkakandidato isip pangulo sa nasud si Makati Mayor Jejomar Binay tungod sa giingong maayong pagdumala niini sa karon progresibo kaayong dakbayan sa nasud.
Gawas sa mga vendor, ang grupo nangangkong hasta senior citizen sector, women’s sector ug youth sector misuporta usab sa ilang laraw.
Sa gihimong panagtigum kagahapon nga gilangkuban sa 42 ka vendors association ug organization sa Metro Cebu lakip na kababayen-an ug kabataan diha sa usa ka hotel sa dalan Colon, mipadayag ang tagsa-tagsa ka mga kahugpungan sa ilang suporta kang Binay.
Si Cebu City United Vendors Association chairman Maria Pino Buanghug sa pakighinabi sa Banat News nagkanayon nga nakadungog sila og balita sa kauluhan nga planong mokandidato si Binay pagkapangulo sa nasud.
Tungod sa ilang nakitang pamaagi pagdumala ni Binay sa Makati City dako ang ilang pagtuong dako kini og matabang pagpaasenso sa nasud ug midayeg kang Binay nga sa tanang prominenteng politiko mao ra kini ang di hangol og media exposure.
Sa gipreparar nilang resolusyon ilang gihulagway ang nasud nga nagkinahanglan og alternatibong lider kansang mga programa modulot ug makapatagamtam hangtud sa kinaubsang sektor sa katilingban.
Ila usab gipalakbitan ang mga lider karong kanunay nga makita ug madungog sa mga balita, photo ops sa telebisyon ug radyo ingon man pamantalaan nga nangangkong sila ray tubag sa krisis karon apan gamay ra kanila ang dunay kongkretong plano.
Ang maong kahugpungan mitawag sa ilang kawsa nga Binay Na! Movement nga tinguhang lukop nasud kumbinsihon aron kini padaganon pagkapangulo sa nasud.