CEBU - Patay ang usa ka nurse human mabangga sa pinutol nga lubi daplin sa karsada ang motorsiklo niining gisakyan samtang mopaingon na unta kining mo-duty sa iyang trabaho sa highway sa barangay Lamintak Norte Medillen, Cebu niadtong Sabado sa tungang gabii.
Ang biktima kinsa wala na makaabot nga buhi sa tambalanan mao si Fredirick Lobetana, 22-anyos, ulitawo, molupyo sa lungsod sa San Remegio, Cebu ug nagtrabaho isip nurse sa Severo Verallo District Hospital sa siyudad sa Bogo.
Matud ni PO2 Archimides Villapes sa Medillen Police Station dihang nahinabi sa Banat News nagkanayon kini nga ang biktima kusog nga nagpadagan sa iyang motorsiklo aron dili ma-late sa iyang duty nianang pagka alas 12:00 sa tungang gabii.
Apan pag-abot sa maong lugar wala makabantay ang biktima sa pinutol nga lubi daplin sa karsada sa tuong bahin nga niresulta sa pagkasangit sa iyang motor nga gisakyan ug nalamba sa karsada ug maayong pagkalabay sa biktima ug nabunal ang ulo niini sa aspaltado nga karsada.
Si Lobetana ang wala magsul-ob og helmet atol sa hitabo ang daling gidala ngadto sa tambalanan nga iyang gialagaran apan tungod sa dakong kadaut sa iyang ulo gideklarar kini ni Dr. Rene Galo Palay nga patay na nga naabot.
Ang motorsiklong gisakyan sa biktima ang maayo usab nga pagkaguba. (BANAT NEWS)