CEBU – Nagtaup pa ang kutsilyo sa bukobuko sa 21-anyos nga lalaki nga gidala sa tambalanan human kini mabiktima sa pagpanunggab sa grupo sa mga batan-ong nasuya kaniya diha sa ilang tindahan sa Poblacion siyudad sa Danao niadtong Biyernes sa alas 11:00 sa gabii.
Ang biktima mao si Conrado Matugas Cabriana, ulitawo, molupyo sa barangay Taytay sakop sa nahisgutang siyudad ug nagtrabaho isip helper sa usa ka tindahan nga namaligya og mga ilimnong makahubog.
Samtang ang mga suspek mao sila si Andrew Castillo, 18, molupyo sa barangay Ylaya ug ang 15-anyos nga kauban niini.
Gibutyag ni PO1 Nelson Pantoja sa Danao City Police nga migawas sa tindahan ang biktima aron unta pagtuman sa sugo sa lawas apan paghiabot niini sa luyong bahin sa tindahan gisunod kini sa duha dayon giluba nga nagtalikod.
Nakasinggit pa og tabang ang biktima dihang nitaop na ang kutsilyo sa iyang bukobuko hinungdan nga nag-iyahay og panagan pahilayo ang mga batan-ong suspek.
Ang biktima gidali pagdala sa Danao District hospital apan gi-refer dayon kini sa mga doctor sa Vicente Sotto Memorial Medical Center (VSMMC) tungod kay nagtaup pa sa iyang bukobuko ang maong kutsilyo.
Gituohan sa kapulisan nga nasuyaan lang ang biktima sa mga batan-on nga suspek apan padayon pa nila kining giimbestigar ang maong hitabo pagtumbok sa motibo sa krimen. – BANAT NEWS