CEBU - Usa ka babayeng nangita og trabaho isip katabang kalit lang nikirig ug namatay kagahapon sa alas 2:15 sa kaadlawon diha sa Tak-an Road sitio Hills Side barangay Talamban ning dakbayan.
Ang namatay diha-diha gilayon human kalit lang nikirig atubangan sa tagbalay giila sa kapulisan nga si Myra de los Santos, 24, dalaga, taga Juan Daan, Bicol.
Base sa imbestigasyon nila ni SPO4 Alex Dacua ug mga kaubanan sa Homicide Section sa Cebu City Police Office ang biktima gikatahong mihangyo sa usa ka Merinessa Pumar, 35, nga usa ka helper diha sa Banilad nga papangitaan siya og trabaho isip katabang.
Apan si Pumar ug ang kauban niini sa panimalay nakurat nalang gumikan kay atol sa ilang pakig-estorya sa namatay kalit lang kining nalup-ug ug nawad-ag panimuot.
Hinungdan nga nanawag gilayon sila og polis dihang gihiling sa mga imbestigador sa kapulisan patay na kini ug way nakit-an o timailhang gipasipad-an kini.
Ang patay’ng lawas niini gipahimutang na karon sa usa sa mga punerarya ning dakbayan. – BANAT NEWS