CEBU - Hingpit nang ablihan sa publiko karong umaabot nga Disyembre 1 ang gipanindot nga Plaza Sugbu sumala pa ni Cebu City Acting Mayor Michael Rama human usab sa gipahigayong tigom sa Cebu Tourism Board niadtong miaging Lunes.
Ang nahisgutang plaza sa atubangang bahin sa karaang Cebu City Hall nga karon gitawag na og Cebu City Legislative Building gigastuhan og kapin sa P11 milyones sa Philippine Tourism Authority ug gipatrabaho sa kagamhanan sa dakbayan.
Ang Plaza Sugbu una nang gitakda nga buksan sa sayong bahin niining buwana apan tungod sa giingong wala matiwas nga trabaho kini giuswag sa laing petsa.
Matud ni Rama nga haom ug tukma ang pagbukas sa maong plaza unya sa Disyembre 1 tungod kay kni mao usab ang pagsugod sa buwan sa Pasko.
Kahinumduman nga ang nahisgutang plaza giinagurahan na niadtong miaging buwan sa Hulyo dungan sa session hall sa legislative building nga gitambungan mismo ni Presidente Gloria Macapagal Arroyo nga maoy pinasidunggang dinapit sa maong okasyon.
Gipasalig ni Rama nga luwas unya suruyan ang plaza bisan pa man sa panahon sa kagabhion tungod usab sa ubay-ubay nga mobantay niini.
Bugtong lang kalainan sa Plaza Sugbu sa ubang mga plaza, mao nga kini walay gibutang nga mga lingkuranan alang sa mga tawo nga mosuroy.
“Gituyo na kay og naay bangko ang tiil ipatong, unya manghigda, unya anha na mangatulog dili na unya ta ana kapugong,” dugang pasabot sa acting mayor. – BANAT NEWS