CEBU - Usa ka polis nga gikan nitambong og court hearing sa dakbayan sa Lapulapu ang gipusil patay kagahapon sa udto ka duha sa tawong nagsakay og motorsiklo diha sa karaang taytayan nga nagdugtong sa Mandaue ug Lapulapu habig na sa Mandaue City.
Ang gipusil patay mao si PO2 Jose Clint Cañete, 39, taga barangay Alegria lungsod sa Cordova ug nadestino sa Regional Anti Illegal Drugs Special Operation Task Group (RAIDSOTG) diha sa Police Regional Office-7.
Base sa imbestigasyon ni SPO4 Ariston Batalona sa Homicide Section sa Mandaue City Police Office kaso sa ilegal nga drugas ang gitambungan sa biktima sa korte. Ang biktima sakay sa iyang motorsiklong Honda Wave paingon dinhi sa dakbayan sa Sugbu apan igo lang nisaylo sa tunga-tungang bahin sa taytayan sa habig na sa Mandaue kalit lang ni-overtake ang duha ka tawong luwan og motorsiklo pulos nag-helmet ug ang angkas nipusil kaniya tulo ka higayon ug natumba diha sa railings sa maong taytayan.
Ang homicide section dunay duha ka mga saksi usa na niini nakatimaan sa motorsikong kolor itom nga Yamaha Crypton ug natiman-an ang plate number (gipugngan sa Banat News).
Si Alex Fernandez nagtrabaho sa Land Transportation Office isip law enforcement officer diha sa Lapulapu ug classmate kaniadto sa Criminology sa biktima nitug-an sa Banat News paingon siya sa dakbayan sa Mandaue niadtong higayona sakay sa iyang motorsiklo.
Matud niya nga iyang nakit-an nga nagbuy-od na ang biktima nga nagtinga ug dihang namay-ongan nga classmate niya kini iya kining gisapwang ug gisakay sa taxi nga nagsunod ug gidala sa Cortes General Hospital apan gidiklarar sa mga doktor nga patay nang nahidangat sa maong tambalanan.
Tulo ka mga samad pinusilan ang naangkon ni Cañete diha sa dughan, ibabaw'ng bahin sa tuong totoy ug usa sa walang kilid nga gituuhang gikan sa .45 nga kalibre nga armas.
Si SPOI Ceilito Cañete maguwang sa biktima ug nadestino sa Special Weapons and Tactics sa Lapulapu City Police Office mitug-an sa mga tigbalita nga panagsa ra silang magkita sa iyang manghud apan kanunay silang magpadad-anay og mensahe pinaagi sa text message.
Matud pa sa maguwang nga dihay higayon nga ni-text kaniya ang manghod nga dunay daghang naligsan sa iyang trabaho maong gipahimangnuan niya kining kanunay mag-amping.
Dako ang pagtuo sa maguwang nga may kalambigitan gyud sa trabaho ang kamatayon sa iyang manghod ilabi na kay nadistino kini sa RAIDSOTG kansang buhatan maoy gitahasan sa pagpanggukod batok sa ginadiling drugas.
Si Supt. Vicente Mersan Premne, Officer in charge sa Mandaue City Police Office ug mga sakop nanglakaw kagahapon sa hapon ug nakig-alayon sa LLCPO aron ilang pakisayran ngadto sa korte kung unsang kasoha ang gitambongan sa biktima aron makatabang kini sa ilang nagpadayong imbestigasyon.
Nakuha sa posesyon sa biktima ang tulo ka cellphone, joint affidavit niini bahin sa kaso sa drugas, .9mm pistol service firearm nga dunay magazine ug 16 ka buhing bala, Motorola hand held radio, usa ka folding knife, ug ang motorsiklo ug helmet.
Si Chief Supt. Ronald Roderos, pangulo sa kapolisan dinhi sa Central Visayas nga nahinabi sa Banat News pinaagi sa telepono kagahapon nagkanayon iya nang gimanduan ang finance officer nga hatagan og financial assistance ang pamilya sa biktima ug entitled usab kini nga mahatagan sa tanang benepisyo sa PNP, sama sa Special financial assistance, burial assistance, unom ka bulan nga suholan base sa iyang ranggo nga PO2 ug ingon man tunolan pa gyud nila kini og medalya. Dako usab ang pagtuo ni Roderos nga may kalambigitan sa iyang trabaho ang pagpusil patay kang PO2 Cañete gumikan kay gikan kini nitestigo sa korte batok sa kaso sa drugas.
Matud ni Roderos ang nahitabo kang Cañete dili makapa-demoralized sa mga kauban ug gani iyang gidasig ang mga polis nga palapdan ug pahugtan ang paggukod niadtong namaligya og ginadiling drugas ug palig-onon pa ang kampanya batok sa drugas.
Hinuon gipahimangnuan ni Roderos ang mga sakop niya sa higayon nga motambong og hearing sa korte ang usa ka polis mas maayong magdala gyud og back-up.
Nasayran nga wala sad mo-function ang security camera sa maong taytayan nga gipanglantawang dako unta og matabang sa kasulbaran sa kaso. – BANAT NEWS