CEBU - Tulo ang angol usa niini inahan ug duha niya ka mga anak dihang gipamusil ug gipangtigbas sa laing pamilya nga ilang kontra sulod na sa pipila ka tuig ang nilabay sa barangay Palanas, Ginatilan niadtong Domingo sa alas 5:00 sa hapon.
Ang mga biktima mao ang manag-inahang si Warlita Donque ug duha ka mga anak niini nga sila si Romulo Donque Jr., 27 ug Maricur Donque Abella, minyo.
Ang gitumbok nga mitigbas kanila mao ang magsuong sila si Russel Sagayno, Ronald Sagayno ug John Ian Sagayno pulos hingkod ang panuigon silingan ra sa mga biktima.
Matud ni SPO4 Marcial Villarin ang officer in charge sa Ginatilan Police dihang nahinabi sa Banat News gikan pa niadtong tuig 2000 nagsugod ang personal nga away sa pamilyang Donque ug Sagayno nga gikan pa sa ilang mga ginikanan ug nakagamot ngadto sa mga anak.
Subay sa inisyal nga imbestigasyon sa kapulisan ang suspek nga si Russel mipugakhang kang Antonio apan nakadagan kini pahilayo hinungdan nga ang iyang igsoon nga si Maricur ang naigo sa tuong paa.
Wala magdugay nisunod ang laing suspek nga si Ronald nga nagdala og pinote ug nideretso kini pagtigbas kang Warlita sa bukobuko, tungod niini gilayog ni Romulo si Ronald .
Pagkakita ni John Ian nga lupigon ang igsuon gisanggot niini si Romulo sa tuong paa.
Niabot sab ang ig-agaw sa mga suspek nga si Cristopher Gurero ug niapil sa karambola hangtod nga nangabot ang mga polis.
Nasikop si Russel ug nakuha gikan sa iyang posisyon ang pugakhang apan nakasibat ang mga igsoon niini nga sila si John Ian ug Ronald.
Apan si John Ian nadakpan sa follow up operation sa kapulisan kagahapon sa alas 10:00 sa buntag sa pinuy-anan nila.
Managkontra na sila si Ronald ug Antonio dihang classmate pa sila sa high school ug magsige na og sukmagay, niadtong 2000 nagkinihaay ang duha ka pamilya human dunggaba ni Russel si Antonio. – BANAT NEWS