CEBU - Estriktong monitoron ug ipadakop sa mga tinugyanan sa Land Transportation Office (LTO-7) ang mga abusadong drayber ug operator sa mga bus pasahero-an nga mobiyahe sa kalungsoran karung sunod semana nunot niining nagsingabot nga pag-obserbar sa adlaw sa mga patay kun kalag kalag.
Si LTO-7 direktor Raul Aguillus dihang nahinabi sa Banat News nga subli nilang ipatuman ang Oplan Kaluluwa tulo ka adlaw sa dili pa ang petsa 1 sa Nobiyembre.
Tumong niini aron haruhay ug way langay biyahe sa mga pasahero nga mopauli sa ilang tagsa tagsa ka mga probinsya atol sa maong adlaw.
Matud ni Aguillus tulo ka adlaw sa dili pa ang kalagkalag ipakatap nila ang tanang deputize agent aron maoy magmonitor niadtong mga sakyanan nga mag-overloading, ingon man kadtong mga kolorum nga sakyanan nga mobiyahe.
Apil sa monitoron ug dakpon sa LTO kadtong mga taxi drayber nga magpakyaw pakyaw ug dili mogamit og metro padulong sa probinsya ingon man kadtong mga bus pasaheroan nga mag-over charging sa pletihan atol sa maong okasyon.
Hinuon hatagan og konsiderasyon sa LTO kadtong mga bus pasahero-an nga makabiyahe gawas sa ilang rota basta makakuha kini og special permit sa Land Transportation Franchising and Regulatory Board (LTFRB).
Matud ni Aguillus mopagawas siya og direktiba sa ilang mga deputize agent karung mosunod nga mga adlaw alang sa hingpit nga pagpatuman sa maong kampanya. – BANAT NEWS