CEBU - Namatay ang usa sa lima ka tawong naangol sa aksidente sa kadalanan nga naglambigit sa sakyanang gimaneho sa usa ka kapitan sa barangay uban sa motorsiklo ug multicab didto sa sitio Pag-utlan sa barangay Yati, lungsod sa Liloan alas 5:00 pasado kagahapon sa buntag.
Ang namatay nailhan nga si Josefina Casul Durano, 73, taga barangay Busay, Cebu City, kinsa maoy nag-backride sa motorsiklo nga gimaneho sa naangol nga si Elpidio Lawas, 44, minyo, nga taga Busay usab.
Samtang ang laing tulo nga naangol nga nagluwan sa multicab mao sila si Joselito Mahina Batican, 33, nga taga Compostela, Bamjer Castillon, 43, ug Elgenesa Talingting, hingkod, pulos taga Compostela.
Si PO3 Ramil Maglasang sa traffic section sa Liloan Police Station mibutyag sa Banat News nga gikan sa dakbayan sa Danao ang motorsiklo nga gidala ni Lawas ug backride niya si Durano.
Nagsunod sa motorsiklo ang pasaheroang multicab nga gimaneho ni Batican nga giluwanan ni Castillon ug Talingting dihang paghiabot nila sa Pag-utlan kalit lang kining gisungag sa gikasugat nga Nissan Frontier, nga gimaneho ni Ivan Momo, 31, minyo, nga kapitan sa barangay Poblacion, Tabuelan kauban sa iyang amahan nga si konsehal Silvestre Momo sa maong lungsod.
Matud pa ni PO3 Maglasang nga gumikan sa kakusog sa impact sa maong panagbangga, miboto ang ulahing ligid sa tuong bahin sa Frontier ug sa pagsaliring niini ngadto sa wala, mibanda usab kini sa motorsiklo nga gisakyan nila ni Lawas ug Durano.
Gumikan sa pagkatarantar, wala kapugngi ni Lawas ang motorsiklo ug midasmag kini ngadto sa multicab nga gimaneho ni Batican.
Gumikan sa kakusog sa pagkadasmag nahalabay sila si Lawas ug Durano ug didto motugpa sa sementadong karsada.
Ang duha daling gihatod ngadto sa Mandaue City District Hospital apan gibalhin kini sa dakbayan sa Sugbu apan nabugtoan gyud sa kinabuhi si Durano sulod sa Vicente Sotto Memorial Medical Center kagahapon sa hapon.
Samtang sila si Batican, Castillon, ug Talingting anaa gihapon sa maong tambalanan.
Samtang si Momo natanggong lang og kadiyot sa prisohan sa kapolisan sa Liloan kay mibayad kini og P30,000 nga piyansa. (BANAT NEWS)