Polis wala i-recall

CEBU - Gipanghimakak ni Acting Director Superintendent Vicente Mersan Premne sa Mandaue City Police Office nga iyang gi-recall ang duha niya ka mga polis nga gidistino sa pagbantay sa session sa konseho sa City Hall.

Ang maong panghimakak iyang gihimo atol sa sesyon sa konseho niadtong miaging adlaw dihang gisukitsukit siya sa mga sakop sa konseho.

Matud pa ni Premne nga wala niya ipa-recall sila si SPO1 Emmanuel Enople ug SPO4 Rodrigo Sevillano apan iya kining gibalhin sa Special Operation Group (SOG) ug Theft and Robbery Section (TRS) sa MCPO.

Si Konsehal Emiliano Rosal nga nahinabi sa Banat News miingon nga natingala kaayo sila sa lakang nga gihimo ni Premne nga mipabalhin og destino sa duha ka mga polis nga wala kanila magpahibalo. – BANAT NEWS