CEBU - Usa ka langyaw’ng Amerikano ang nakit-an na lang nga patay na sulod sa pansayan sa pinuy-anan niini didto sa Sitio Langub, barangay Guinacot, siyudad sa Danao niadtong Miyerkules sa alas 10 sa buntag.
Ang maong langyaw nga nakit-ang wala nay kinabuhi mao si Jeffrey Lewis Turner, 69, minyo, molupyo sa nahisgutang lugar ug naminyo og usa ka Pilipina nga nagpuyo usab sa maong dapit.
Ang Pilipina nga asawa niini nga mao si Marissa Manulat Turner, 48, maoy daling mi-report sa kapolisan kabahin sa maong panghitabo.
Matud ni PO1 Nelson Pantoja sa Danao City Police Station sa dihang nahinabi sa Banat News subay sa blotter nga gibasehan niini nakit-an nalang sa asawa niini pagsulod sa pansayan niini nga nagbuy-od ang maong langyaw ug wala na kini magginhawa hinungdan nga gi-report dayon nila kini sa kapulisan.
Daling mirespondi si SPO1 Edgar Awe kauban ang City Health Officer nga si Dr. Eric Echavez ug didto nakonpirmar nga patay na ang maong langyaw ug ang patay'ng lawas niini gidala sa Saint Peter Funeral Homes alang sa autopsy pagtino sa hinungdan sa kamatayun niini. – BANAT NEWS