CEBU – Dako ang pagtuo ni acting Mayor Hilario Davide III nga dili lang gihapon mulampos ang laing impeachment complaint batok kang Presidente Gloria Macapagal Arroyo.
Ang anak ni kanhi House Speaker Jose de Venecia Jr., nga si Jose de Venecia III ug kaubanan gitakdang mosang-at sa impeachment complaint karong adlawa.
Niadto ra untang miaging adlaw i-file ni de Venecia ang reklamo batok sa presidente apan walay midawat niini tungod kay wala sa iyang buhatan ang secretary general sa kongreso.
Matud ni Davide nga ang impeachment usa ka number game ug kini giingong dili molampos kun dili mosuporta niini ang igong gidaghanon sa mga kongresista.
Ubay-ubay nga mga kalapasan ug kahiwian ang hinungdan nganong gusto ni de Venecia ug kaubanan nga taralon ang presidente sa impeachment court.
Kini giingong naglakip sa betrayal of public trust, culpable violation of the Constitution, bribery, graft and corruption ug uban pa.
Apan nagtuo ang acting mayor nga kuli nga mahitabo ang gitinguha sa mga reklamante kun kini dili makakuha og igong botos gikan sa mga kongresista.
Sa nasayran, ang Ubos Balay Balaoranan gidominar karon sa mga kongresista nga kaalyado ug kapartido ni Arroyo.
Nanginahanglan og labing minos 79 ka botos sa mga kongresista ang impeachment complaint aron kini maduso ngadto sa Senado.
Tambag ni Davide ngadto nilang de Venecia nga suportahan na lang ang presidente aron magmabungahon ang pagpangatungdanan niini hangtud sa tuig 2010.
“Kung akoy pasultihon hapit na bitaw nang 2010, maayo pang tabangan na lang nato ang presidente ba nga mulampos ug mahuman ang iyang termino,” sumala ni Davide.
Kini bisan pa man kun ang mga pasangil nilang de Venecia batok kang Arroyo gihulagway sa acting mayor nga mas bug-at itandi sa miaging impeachment complaint.
Katapusang impeachment complaint nga gisang-at sa kongreso natigayon niadtong Oktobre 11 sa miaging tuig nga gibasura usab sa Ubos Balay Balaoranan. – BANAT NEWS