CEBU – Ipahigayon karong adlawa ang ikaduha na nga “OCTOBERPETS”, diha sa University of the Philippines (U.P. Cebu soccer field).
Kini pasiugdahan sa Cebu Companion Animal Practitioners ingon man sa Department of Veterinary Medicine and Fisheries (DVMF).
Matud sa labaw sa DVMF nga si Doctor Alice Utlang, nga ang Octoberpets mao ang pagpakita sa nagkadaiyang matang sa kahayopan.
Kini agi usab og pagsaulog sa mga pet lovers sa Animal Welfare Week nga gitakda sa unang semana sa Oktobre.
“Ang ato aning tuyo is to create awareness ba sa mga tawo to be responsible pet owners because animals are God’s creation too,” sumala ni Utlang.
Makita sugod karong alas 8:00 sa buntag hangtod sa alas 4:00 sa hapon mao ang nagkadaiyang zoo animals sama sa buaya, bitin, kabayo, langgam, iro ug uban pa.
Nagkanayon si Utlang nga labing minos 20 ka nagkadaiyang matang sa hayop ang dalhon sa mga tag-iya niini diha sa U.P. Cebu ground.
Miingon ang labaw sa DVMF nga sa dili pa sugdan ang programa aduna unay ipahigayon nga mass blessing alang sa tanang hayop nga dalhon sa mga tag-iya.
Human niini ipahigayon gilayon ang dog show, ug ang ubang kompetisyon sa nagkadaiyang kahayopan alang sa kalingawan sa tanang tumatan-aw.
Adunay ipahigayon usab nga free clinic sa mga hayop, adunay mga giveaways ug labaw sa tanan adunay ipamaligya nga mga hayop.
Lakip sa mga grupo nga mipasalig nga modala sa ilang kahayopan mao ang Cocolandia, Pitbull Club, Cebu Avian Society ug ubang individual pet owners.
Nakasiguro si Utlang nga malingaw ang tanang mga tawo nga moadto sa U.P. Cebu ground tungod sa mga zoo animals nga makita karong adlawa.
Partikular na niini ang mga tinun-an ug kabataan nga giimbitar sa mga organizers nga mosaksi sa nagkadaiyang animal show. – BANAT NEWS