CEBU – Ang pagsuta sa kahimtang sa mga luna sa yuta maoy angayang unahon sa mga negosyante sa dili pa motarok og negosyo aron madali ang paghikay sa mga dokumento niini.
Kini maoy gisugyot ni Konsehal Emiliano Rosal pinaagi sa giduso niyang resolusyon nga nagpasabot nga usa sa angayang sutaon sa usa ka negosyante mao ang klase o land classification sa luna.
Kini tungod kay alang kang Rosal dili mahimong tarokan og negosyo ang usa ka luna nga giklasipikar para sa kabalayan kon residential.
Gipasabot niya nga ang establisementong para sa negosypo kinahanglan adto kini itarok sa luna nga may commercial classification.
Busa kun pugson sa usa ka negosyante nga motarok og negosyo sa lugar nga dili para sa negosyo, dako kaayo niyang kahasol kay magpunay na usab kini og yangongo sa taga opisina aron lamang kahatagan og konsiderasyon ang iyang gusto.
Matud pa ni Rosal nga mao kini makasangit sa usa ka negosyonte tungod kay dili man makahatag og business permit ang kagamhanan sa usa ka patigayon gawas lamang kun dili kuwestionable ang gitarokang luna niini.
Gumikan niini si Rosal midangop sa tabang sa taga media aron sa pagsabwag ning maong kasayoran ngadto sa publiko ilabi na sa mga negosyante.
Gawas sa taga media nagpakitabang usab si Rosal sa taga Mandaue Chamber of Commerce and Industry, Bankers Association, mga barangay kapitan ug uban pa.
Gipasabot ni Rosal nga daghan kaayong application for variance permits ang nasangit ug wala kaaprobahi tungod sa kapakyas sa mga aplikante niini sa pagsusing daan sa lugar nga ilang gitarokan sa ilang balay patigayon. – BANAT NEWS