CEBU – Laing insidente na usab ang nalambigitan sa anak sa mayor sa dakbayan sa Talisay nga si Joavan Fernandez human gipasanginlan kining miitsa og bala ug hapit paligsi sa iyang sakyanan dayon gisukmag ang usa sa mga kanhi kawani sa motorpool tungod sa selos niadtong Biyernes sa hapon diha sa compound sa city hall sa dakbayan sa Talisay.
Ang laing biktima ni Joavan mao si Kashmir dela Cuesta, kanhi job order sa motorpool kinsa usab kanhi maoy kanunay’ng ikuyog-kuyog ni Joavan ug gani niadtong higayon nga gidunggab si Joavan ni Randy Bazar sa Sitio Magay, Barangay Tanke uban niya niadtong tungora si dela Cuesta.
Base sa log book sa gwardiya sa motorpool, mga alas 3:39 niadtong Biyernes sa hapon si Joavan kinsa sakay og Pajero nga kolor green miabot sa motorpool.
Si Joavan misulod ngadto sa buhatan ni Loloy Fernandez kinsa maoy hepe sa motorpool.
Apan pipila ka minuto migawas si Joavan gikan sa buhatan sa iyang uyoan mibalik ngadto sa iyang sakyanan diin duna kini gikuha dayon mibalik na usab kini ngadto sa buhatan sa iyang uyoan.
Gikataho nga niadtong higayona diha si Kashmir aron mag-follow-up kun mahatagan na ba siya og balik og punch card aron makabalik na sa iyang trabaho.
Ang ulo ni dela Cuesta maayong pagkahagtok tungod kay giitsahan kini og bala ni Joavan ug human sa pagpangitsa og bala nagkanayon ang anak sa mayor ngadto kang dela Cuesta nga “regalo na nako nimo!”
Human sa maong hitabo si Joavan mibalik ngadto sa iyang sakyanan ug mibiya sa motorpool.
Mga alas 4:40 sa hapon sa mao gihapong adlaw mibalik na usab si Joavan diha sa motorpool sakay sa mao gihapon niyang sakyanan ug gikatahong misuway kini sa pagligis kang dela Cuesta samtang ang biktima nagsakay sa iyang bisekleta padulong nang mobiya sa lugar.
Gikataho nga si Joavan mikanaog sa iyang sakyanan ug gisukmag si dela Cuesta apan wala mosukol ang biktima.
Ang gwardiya nga duty sa motorpool niadtong higayona nga si Jerry Diaz daling mitawag sa kapolisan aron maalarma ang maong hitabo apan si Joavan nakabiya na sa pag-abot sa mga polis.
Sumala pa nga si Joavan nagselos kang dela Cuesta tungod sa pagtuo niini nga nanguyab kini sa babayeng nalambigit niini. – BANAT NEWS