CEBU - Ang mga empleyadong Muslim nga nagtrabaho sa tugpahanan sa Mactan Cebu International Airport (MCIA) nagpasalamat kay gihatagan silag lugar nga alampoanan diha sa sulod sa tugpahanan.
Si Immigration Officer Dilausan “Dino” Montor nga nadistino sa MCIA nagkanayon nga mapasalamaton kaayo sila kang General Manager Retired General Danilo Francia sa Mactan Cebu International Airport Authority nga maoy migahin og lugar diin adto mag-ampo ang mga Muslim agig pagtamod sa Ramadan.
Matud pa ni Montor nga sa pagsugod sa Ramadan iyang gihangyo si Gen. Francia nga hatagan unta sila og lugar nga solemni alang sa buhaton nilang mga pag-ampo uban sa mga igsoon nilang Muslim nga nag-alagad sa maong tugpahanan.
Gikalipay ni Montor ang pagtugot ni Francia kay ang usa ka lugar sa International arrival section maoy gigahin nga ampoanan sa mga Muslim ug kini maoy ilang gigamit nga dapit matag adlaw nilang pag-ampo.
Matud pa ni Montor nga gawas sa pagsaulog sa RAMADAN niining tuiga, mitugot usab si Gen. Francia himoon na ang maong lugar nga permanenteng ampoanan gumikan kay makapahimulos usab niini ang mga langyaw nga Muslim nga moabot diha sa tugpahanan diin mohapit kini ug mopadayag sa ilang pag-ampo ni Allah. – BANAT NEWS