CEBU – Ang mga lugar sa dakbayan sa Talisay nga pirmeng bahaan sa panahon sa tinguwan maoy unang himoan og Comprehensive Master Drainage Plan (CMDP) matud pa sa hepe sa City Planning Development Coordinator Christine Homez.
Ang CMDP maoy gituohan nga makasulbad sa problema sa baha sa Talisay ilabi na panahon sa ting-uwan gumikan sa kakuwang niini og mga imbornal nga kaagian sa tubig.
Matud ni Homez nga ang proyektong pagpanganal anam-anamon lang sa pagtrabaho tungod sa problema sa budget.
Ang maong proyekto nagkinahanglan og kapin P100 milyones nga pundo ug bahinon sa tulo ka higayon sa pagtrabaho.
Sa milabay’ng semana ang mga opisyal sa dakbayan uban sa Spaces System Consultancy .4719 nga consultant sa proyekto, ug mga opisyal sa barangay nagtagbo didto sa Stakili Beach Resort sa lungsod sa Compostela.
Sa maong tigom gipresentar ngadto sa mga opisyal sa barangay ang pasiunang plano sa proyekto ug gipangayoan sila og mga ideya lakip na ang ilang mga yangongo aron wala nay problema inigsugod na sa trabaho.
Ang dugang usab nga problema matud ni Homez mao ang bahin sa mga pribadong luna nga maagian sa kanal nga kasagaran maoy ikalangay sa trabaho ilabi na kun masuko na ang tag-iya.
Si Homez midugang nga sa sunod nilang tigom ilang ipresentar ngadto sa mga opisyal sa barangay ang mga lugar nga unahon sa pagpanganal aron masayod sila niini.
Ang nahisgutang proyekto gipaningkamutan nga ikapatuman sayo sa sunod tuig. – BANAT NEWS