CEBU - Patay ang usa ka empleyado sa Carmen Copper Corporation (CCC) ang kanhi Atlas Mining Corporation sa Lutopan siyudad sa Toledo human malamba ang gisakyan niining motorsiklo ug maayong pagkabunal sa ulo niini dihang nakaligis og usa ka hubog nga lalaki nga nikalit og labang sa dalan sa barangay Poog sa maong siyudad Biyernes sa alas 11:40 sa udto.
Ang biktima nga Dead on Arrival sa Toledo City District Hospital mao si Servillo Ariate, 59, molupyo sa barangay Talavera ug kawani sa maong minahan.
Samtang naangol sab ug nalandig sa tambalanan ang usa ka hubog nga si Jose Depariene Rosalita, 49, molupyo sa nahisgutang lugar dihang nabanggaan sa motorsiklo niini.
Matud ni PO2 Edmund Liston sa Toledo City Police dihang nahinabi sa Banat News gikan sa trabaho si Ariate ug paingon na mopauli dihang paghiabot niini sa nahisgutang lugar kalit nga nitabok sa karsada si Depairene nga hubog ug tungod kay uwahi nang nakabantay si Ariate nikalit nalang kini og break apan tungod sa kakusog sa iyang pagpadagan nalamba ang motorsiklo ug nalabay ang biktima ingon man ang helmet niini ug maayong pagka liki sa agtang dihang nabunal kini sa semento nga karsada.
Samtang si Depairene igo lang nakaangkon og bun-og ug pangos sa iyang kalawasan ug pulos gidali og tabang ang mga biktima ug gihatod dayun sa tambalanan diin gideklarar nga patay si Depariene. (BANAT NEWS)