CEBU - Usa ka rocket propelled grenade kon RPG ang nakit-an sa kasagbutan nga lugar sa bukirang bahin sa sitio Libbi barangay Biasong lungsod sa Balamban niadtong Martes sa alas 5:17 sa hapon.
Matud ni PO2 Rolando Navarro sa Balamban Police dihang nahinabi sa Banat News gibana-banang moabot 16 pulgadas ang gitas-on sa maong nakaplagang bomba nga motimbang usab og sobra sa dos kilos.
Gituohan kining nahabilin sa military exercise sa maong lugar niadtong nilabay'ng mga katuigang posibleng wala kini mobuto (dud) pagtugpa.
Usa ka nagpailang concerned citizen ang nitawag sa telepono sa kapulisan ug nipahibawo sa nakaplagang bomba sa maong lugar.
Gibana-bana sab ni PO2 Navarro nga susama og bukton sa tawo ang gidak-on sa maong RPG. (BANAT)