CEBU - Kasong attempted homicide ang gisang-at batok sa usa ka kawani sa city hall nga nadakpan sa mga sakop sa Special Weapon and Tactic (SWAT) human kini makapusil sa miaging gabii.
Kini ang nasayran kang PO3 Dante Wenceslao dihang nahinabi sa Banat News kagahapon kinsa miingon nga si Rochwald Bering, 27, nga taga Tribunal, Centro sa maong dakbayan nagtingkagol na karon sa prisohan.
Si Bering maoy suspetsado nga nakapusil kang Roderick Ramayla, 25, nga lumad nga taga Ronda ug kawani sa Land Transportation Office (LTO) sa Looc sa maong dakbayan.
Si Marife Cabiles, 21, dalaga nga lumad nga taga dakbayan sa Toledo ug stay-in nga kawani sa Alu Food House sa Centro sa maong dakbayan maoy usa sa mga nakasaksi sa maong hitabo.
Matud pa ni PO3 Wenceslao nga ilang gipaubos sa paraffin test ang suspetsado aron pagsuta kun positibo ba kining nakapaboto sa armas sanglit wala man masakmit ang maong hinagiban dihang nasikop kini sa mga sakop sa SWAT.
Dugang pa niya nga naigo lamang sa paa ang biktima sa maong pagpamusil ug luwas na kini karon gikan sa kamatayon. (BANAT)