CEBU - Mopatawag og public hearing ang Land Transportation Franchising and Regulatory Board (LTFRB-7) alang sa giduso nga petisyon pagpatuman og rollback sa pletihan sa PUJ ug taxi nunot niining padayung pagkunhod sa presyo sa produktong petrolyo.
Hinoon gibutyag ni LTFRB-7 director Romulo Bernardez nga gipaabot pa nila ang iduso nga position paper sa habig sa mga drayber ug operator may labot sa maong petisyon.
Ang kanhi regional director sa LTFRB-7, Atty. Emmanuel Iway maoy nisang-at sa maong petisyon nga nag-awhag nga ibalik ang karaang minimum nga pletihan gikan sa P8 sa first five kilometers ngadto sa P6 ug ang pagpapas sa P10 nga add on rate sa taxi.
Matud ni Bernardez posibleng sulod niining buwana himuon ang public hearing sa higayun nga madawat na niya ang position paper sa drayber ug operator.
Gidugang sa director nga gipahibawo na niya ang ilang ulohang buhatan sa LTFRB ug gisona kun mahimo ba nga siya makadesisyon sa petisyon alang sa rollback sa plitihan nga giduso sa ilang buhatan.
Si Bernardez una nang nipagawas og pamahayag nga angay nang mopatuman og rollback tungod kay nagkabarato na ang petrolyo karon apan di siya makalihok niini kung walay petisyon.
Ang bise presidente sa Citrasco, Ryan Yu dali dayong misupak sa rollback tungod kay alang niya dili pa karun panahon bisan paman sa sunod sunod nga pagkonhud sa presyo sa produktong petrolyo.
Matud pa niya pabilin gihapon nga nagsaka ang presyo sa mga spare parts ug ning bag-uhay lang ang suppliers sa piyesa nipahibalong mopasaka sila og 10 porsiyentong usbaw. – BANAT NEWS