CEBU – Unipormeng alang sa mga kawani sa Cebu City Hall wala pa gihapon mahatag bisan niadto pang buwan sa Marso sila nakaimpas sa bayad niini ug gituuhang imbes nga ipalit dayon og uniporme gibutang una kini sa bangko aron matuboan og porsiyento.
Ang mga kawani gikatahong gipangayoan og tagsa ka libo alang sa maong mga bag-ong uniporme nga polo shirt.
Si Mayor Tomas Osmeña dihang gipangayoan og pamahayag niini nagkanayon nga wala pa siya makadawat sa maong reklamo apan misaad nga iyang susihon kung asa na ang maong mga uniporme alang sa mga kawani sa Cebu City Hall.
Nagduda ang pipila ka mga kawani nga gipundo sa bangko ang kwarta aron kini motubo ug makaganansya sa interes ang nagdeposito.
Matud pa sa mayor nga wala siya'y gipahunong ug labaw nang walay gipugngan nga susamang transaksyon.
“I’m not stopping anything and I didn’t change anything, I just don’t know but I will ask Bimbo (Fernandez) about it,” sumala sa mayor.
Ang City administrator nga si Fernandez maoy gusto ni Osmeña nga pangutan-on sa kalambuan sa uniporme.
Dihang gitawgan sa Banat News si Fernandez sa iyang mobile phone aron pagkuha og tubag katin-awan kabahin niini walay motubag sa maong telepono.
Gipaabot hinuon nga karong adlawa mapasabot na ni Fernandez ang nadelatar nga pag-release sa uniporme sa mga kawani.
Nasayran gikan mismo sa mga empleyado nga kanunay lang malangay ang pag-release sa ilang uniporme matag tuig. – BANAT NEWS