CEBU - Mosubra sa tunga sa milyon ka pesos ang gibilin nga danyos nga niugdaw sa tulo ka mga panimalay sa managlahing insedente sa sunog dinhi sa dakbayan kagahapon sa kaadlawon.
Unang naugdaw mga ala-1:47 kagahapon sa kaadlawon ang usa ka panimalay diha sa Proper Buhisan ning dakbayan, mao ang panimalay ni Purita Cañada hingkod ang panuigon.
Ang sunog gikatahong nagsugod sa kusina niini dihang kalit nga nisilaob, hinuon nakontrolar sa kabomberuhan sa dakbayan sa Sugbu ang maong sunog sulod lang sa dos minutos nga napaubos sa first alarm, diin ang danyos gibana-banang moabot sa P90 mil ka pesos.
Samtang pagka-ala-1:52 pipila lang ka minutos gilamoy usab sa kalayo ang duha ka mga panimalay diha sa Acasia St., barangay Camputhaw ning dakbayan.
Sumala pa ni SFO2 Alicasim Espinola nga hingpit nga naugdaw ang mga panimalay nila ni Albert Arriba ug Jona Dalida ug laing usa ka panimalay nga partially burn, gibana-banang mokabat sa P600 mil ang danyos nga gibilin niini.
Gikataho nga ang maong sunog nagsugod sa panimalay ni Arriba ug gituuhang gikan kini sa kuryente, hinuon nakontrolar kini dayon sulod lang sa 40 minutos nga gipaubos usab sa 3rd alarm. -Banat News