CEBU - Ipadayon sa Cebu City Health Department ang mist spraying diha sa pipila ka publikong mga tunghaan sa dakbayan subay sa higpit nga kamandoan ni Mayor Tomas Osmeña nga dili niya ipahunong ang nahisgutang kalihukan.
Kini bisan pa man kung duna nay mga tinun-an nga nalandig sa tambalanan dihang nakahanggap sa baho sa kemikal.
Nagtuo ang mayor nga ang mist spraying dako og natabang pagpakunhod sa mga kaso sa dengue dinhi sa siyudad ug kini mipasidaan sa mga hingtungdan nga palikayon ang mga tinun-an sa higayon nga sugdan na ang mist spraying sa usa ka tunghaan.
Tungod niini ang City Health padayon karong niila og mga eskwelahan sa dakbayan nga pahigayunan sa mist spraying.
Matud sa dengue coordinator sa City Health nga si Dorenda Macasucol nga ilang ipadayon karong Sabado ang pagpang-spray sa mga tunghaan.
Ang bisitahon sa City Health alang sa mist spraying sa nahisgutang adlaw mao ang Banawa, Kalunasan ug Oprra Elementary School.
Samtang ang Pit-os Elementary School unya na sa Septembre 19, ug ang Cambinocot Elementary School unya usab sa Septembre 26.
Nasayran nga nahuman na ang pagpahigayon og mist spraying sa pipila ka mga tunghaan nga naglakip sa Zapatera ug Camputhaw Elementary School.
Apan duha ka tinun-an sa Zapatera ang gidala sa tambalanan human malipong ug naglisod pagginhawa dihang nakasimhot sa baho sa kemikal.