CEBU - Arestado ang tulo ka mga gipasanginlang mga snatchers lima ka oras human nila labnihi ug nasamdan ang usa ka miyembro sa choir sa simbahan sa Iglesia ni Kristo.
Gumikan ra usab sa ilang pagpanghambog sa ilang nakuhang butang nga ilang gidispatsar diha sa sapa sa Guadalupe natultulan sila sa mga polis pinaagi usab sa abag sa usa ka barangay tanod.
Si SPO3 Ullysis Racaza sa Theft and Robbery Section sa pakighinabi sa Banat News miila sa mga dinakpan mao sila si Frank Simon Ababo, 18, duha ka silingang 17-anyos nga pulos taga sitio Lower Kalunasan sa barangay Kalunasan.
Ang tulo positibong giila sa biktimang si Cecille dela Cruz Macapagal nga taga-barangay Talamban human ipresentar sa mga polis ang kaniya.
Ang pagpanglabni matud pang Racaza nahitabo diha sa dalan F. Sotto diha sa barangay Camputhaw sa kaadlawon samtang si Macapagal naglakaw padulong sa simbahan aron unta motambong sa misa.
Ang mga suspek luwan sa usa ka motorsiklo nga gimaneho ni Ababo ug dihang diha na sila sa tungod sa biktima kalit nga nangambak ang duha ka 17-anyos nga angkas ug gitabangan og labni ang bag ug giduot sa sementadong dalan ang biktima.
Gumikan sa pagduot nangapangos ang mga tuhod ug bukton sa biktima lakip na ang operasyon niin sa siko ug nakuha usab ang iyang bag nga maoy gisudlan sa iyang cellphone, uniporme sa choir ug sinina.
Matud pang Racaza dihay usa ka tanod nga kaila og polis nga nadestino sa Police Station 1, mipahibalong nakit-an niini ang mga suspek diha sa may sapa nga dunay gilabog nga bag.
Gikatahong nanghambog pa ang tulo sa pag-ingon nga “mao ra ni among nakuha” gumikan niini daling mipahibalo ang tanod sa maong polis ug mao na usab ang mitawag sa TRS.
Human madakpi ang tulo dali silang miangkon nga maoy nilabni sa bag sa biktima ug gitultulan sa balay sa usa sa mga 17-anyos diin nila gitagoan ang ilang mga nakuha kang Macapagal. – BANAT