Labihang hilaka sa driver human sakmita sa mga otoridad ang karga niining 60 ka manok-inihaw gikan sa Mandaue City kagahapon sa buntag.
Kini maoy gibutyag ni Doctor Alice Utlang, ang labaw sa Department of Veterinary Medicine and Fisheries (DVMF) sa Cebu City Hall kinsa miila sa mitibing drayber nga si William Salem.
Si Salem nakalitan dihang maoy nasugatan niya ang mga sakop ni Utlang nga nangayo kaniya og meat inspection certificate ug dihang napakyas siya sa pagpakita niini, gisakmit ang iyang mga manok nga balor og P8,000.
Hinoon dihang mikulisiw siyag hilak, gipabayad lang siya og P2,000 sa mga meat inspector nga nagpatuman sa Operation Hot Meat ug giuli ang iyang mga manok.
Miingon si Utlang nga ang gihilakan ni Salem, mao nga siya’y pabayron ni Gerry Abad, ang tag-iya sa maong mga manok sa multa nga gisingil sa mga meat inspector kaniya.
“Nagpahilak-hilak man ug nagpakilooy ambot ug wala lang ba pud to nagdrama-drama kay mao kunoy pabayron sa tag-iya,” sumala ni Utlang.
Matud ni Utlang nga kalapasan sa City Ordinance 1644 kon ang Meat Regulatory Ordinance kun walay ikapakitang papeles o meat inspection certificate ang magdala og inihaw nga karne kay kini matawag nga hot meat.
Matud ni Utlang nga base sa nahisgutang ordinansa, mahimong pamultahon ang tag-iya sa karne nga makalapas niini.
Nasayran hinuon sa Banat News nga makapila na ka higayon masakmiti og mga karneng manok ang mga driver nga pakomprahon ni Abad.
Tungod niini, gihatagan na og katapusang warning ni Utlang si Abad pagsubay sa tukmang proseso pagkompra sa maong matang sa karne.
Niingon si Utlang nga kung sila makasakmit lang gihapon og mga hot meat nga gipanag-iya ni Abad, dili na kini nila iuli.
Sumala ni Utlang nga ang Operation Hot Meat padayong nihingusog pagmonitor sa mga karne nga mosulod dinhi sa siyudad aron sa pagsiguro nga kini luwas kan-on sa mga konsumidor.