Gipusil-patay ang usa ka batan-ong lalaki nga gikatahong magsulod-gawas na sa bilanggoan tungod sa mga kasong pagpangawat ug illegal possession of firearms samtang nagpalit kini og softdrinks sa usa ka tindahan sa barangay Canbañua lungsod sa Argao niadtong Martes sa alas 2:15 sa hapon.
Ang biktima mao si Willard Careon, 24, molupyo sa nahisgutang lugar samtang ang suspek giilang si Jake Alcain, silingan ra usab sa biktima.
Matod ni PO1 Renato Nacaytona sa Argao Police Station dihang nahinabi sa Banat News nipalit og softdrinks ang biktima sa usa ka tindahan niadtong tungura dihang giduol ug gidul-itan og pusil sa suspek samtang nagtalikod duha ka higayon.
Ang biktima naigo sa iyang bukobuko nga nilapos sa dughan ug gitabang sa silingan pagdala sa Isidro Kintanar Memorial Hospital apan gideklarar kini nga dead on arrival (DOA).
Subay sa inisyal nga imbestigasyon sa kapulisan ang biktima ug suspek duna na kaniadtoy panagbangi tungod kay pulos kini magpa-ila nga maoy isog sa ilang lugar.
Gitug-an ni Nacaytona nga ang biktima makadaghan na magsulod ug gawas sa detention cell sa kapulisan sa Argao tungod sa mga kaso niining pagpangawat ingon man illegal possession of firearms apan nakagawas tungod kay sagad sa mga reklamante ang dili na pursigido pagpasaka og kaso.
Padayun pang gipangita ang suspek samtang giandam sa kapulisan ang kasong ipasaka niini.