Gisuholan og P2,000 ang suspek nga mipusil patay sa 60 anyos nga lola didto sa barangay Anislag lungsod sa Pinamungajan niadtong Domingo sa alas 5:00 sa hapon.
Ang tulo ka mga suspek mao sila si Veronico Berolo, 48, minyo, ug molupyo sa nahisgutang lugar, Irenio Panutan, 24, minyo, taga barangay Tubod, San Fernando ug Jefrey Rabago, 31, ulitawo, taga Lahug, siyudad sa Sugbu kinsa kargador diha sa merkado sa Carbon.
Matud pa ni SPO1 Edwin Tiro administrative officer sa Pinamungajan Police Station nga nahinabi sa Banat News nga si Rabago maoy miangkon nga maoy mipusil ni Buenaventura Villeta, 60, buwag sa bana ug nagpuyo kauban sa iyang 9 anyos nga apo nga si Sharmine Villeta kinsa maoy bugtong saksi sa maong hitabo.
Apan gitug-an ni Rabago sa mga pulis nga gitanyagan siya ni Berolo og P2,000 nga suhol kun mapatay niini ang biktima.
Midugang si SPO1 Tiro nga sa pagpusil sa biktima, wala pa madawat ni Rabago ang maong kantidad kay gipasaligan siya ni Berolo nga adto ra siya bayri sa Carbon inigbiyahe niini og utanon sa Carbon.
Si Berolo ug si Panutan kinsa pag-umangkon ug apo ang usag-usa sa biktima suod kaayong kaila ni Rabago tungod kay kanunay kining magtumoran og mga utanon sa Carbon diin si Rabago maoy tigkarga sa ilang mga baligya.
Gitug-an ni Rabago nga si Berolo maoy nakigsabot kaniya niadtong Sabado ug gidala dayon siya ngadto sa barangay Anislag ug nianang pagka Domingo gisulong dayon nila ang biktima sa iyang balay didto sa Anislag ug gipatay.
Kagahapong adlawa gipasaka na sa kapolisan ang kasong murder ingon man attempted murder batok sa mga suspek diha sa provincial prosecutors office.
Ang 9 anyos nga apo sa biktima maoy mibutyag nga si Berolo nga iyang uyoan maoy kauban sa mga kriminal ug maoy nagiya sa mga otoridad sa pagsikop kang Berolo, Panutan, ug Rabago.
Ang panagbangi sa yuta sa pamilya maoy gituohang motibo sa maong kremin sanglit aduna kunoy bahin sa yuta nga gi-prenda sa biktima nga gikasuko sa mga kaliwat niini.