Patay nang niabot sa tambalanan ang usa ka negosyante og baboy human kini ma-kuryentihi samtang nag-asikaso sa mga binuhing baboy sa barangay Otso lungsod sa Tuburan niadtong Domingo sa alas 6:30 sa gabii.
Ang namatay mao si Antonio Alfar Supatan, 56, molupyo sa nahisgutang lugar.
Sumala pang SPO1 Gaudencio Pariel, desk officer sa Tuburan Police dihang nahinabi sa Banat News dunay gamay’ng piggery sa likod nga bahin sa ilang balay si Supatan ug usa sa mga anay ang bag-ohay pang nanganak.
Tungod kay gagmay pa ang mga baktin gilain niini og tangkal ang anay ug gibutangan og suga apan sa iyang paghawid sa socket nga tauran unta og bombelya nakuryentihan kini.
Wala diha ang mga kabanay ni Supatan kay nanglakaw maong walay bisan usa nga nakatabang kaniya, sa pagbalik sa mga kabanay sa balay gisuwayan unta kini pagdala sa Tuburan District Hospital apan gideklarar kini nga Dead on Arrival (DOA).
Giklaro ni SPO1 Pariel nga walay foul play ang kamatayon sa biktima ug ang pagka kuryente niini mao gyud ang hinungdan sa iyang kamatayon.