Mga kinahon nga mahalong pabuto nasakmit sa mga sakop sa Criminal Investigation and Detection Group-7 diha sa usa ka barko nga padulong molawig sa Surigao human kini madiskubrehing gitago isip “fiber products.”
Ang grupo ni SPO2 Delfin Bontuyan sa CIDG-7 nakadawat og tawag gikan sa usa sa mga kawani sa Cokaliong Shipping Lines kabahin sa maong kadudahang kargamento nga gisulod sa 16 ka kahon nga ang gideklarar “fiber products.”
Dihang ilang gihiling ang sulod nadiskubrehang dili kini mga “fiber products” kundili nagkalain-laing mga matang sa mahalong mga pabuto hinungdan nga kini gisakmit.
Sumala pa sa kapolisan ang maong shipping firm midumili sa pagkarga niini gumikan kay gawas nga wala itug-an sa shipper nga si Nicanor Narval nga taga Surigao City ang tinuod nga kargamento, peligro usab kini sa barko.
Human sakmita wala na mopakita ang giingong shipper hinungdan nga kini gidala nalang sa kapolisan diha sa ilang buhatan.
Sumala pang Bontuyan ang pagbiyahe og mga pabuto o bisan unsang matang sa mga kemikal ug eksplosibo kinahanglang dunay permiso gikan sa Firearms, Explosives Security Agency Guards Supervisory Section.
Posible usab nga pasakaan og kasong paglapas sa RA 718 si Narval kalabot sa maong kaso.
Samtang si Chester Cokaliong ang tag-iya sa Cokaliong Shipping nga gikahinabi sa Banat News nagkanayon nga dako ang iyang pagtuo nga naggamit lang og laing pangalan si Narval.
Kini tungod kay si Narval wala na mopatim-aw diha sa ilang buhatan alang sa pag-claim sa mga kargamento ug gani ni-risgo sa iyang kwarta pagbayad sa mga kargamento bisan nahibalo kining gidili kini ipasakay sa barko.
Matud pa ni Cokaliong nga tibuok tuig silang nipahugot sa ilang seguridad sa mga sakyanan nila sa kadagatan nga dili nila ikompromiso ang kaluwasan sa iyang mga pasahero tungod lang sa usa ka kargamento.
Nunot niini hatagan niya’g commendation ang usa niya ka kawani kinsa maoy nakabantay sa maong mga eksplosibo.