Mga establisamento ug kapolisan diha palibot sa Pardo Police Station nagtinabangay sa pagtuki sa mga solusyon kontra pagpanulis diha sa ilang lugar atol sa gihimong pakigpulong sa kapolisan niadtong Miyerkules.
Ang hepe sa Pardo police station nga si Chief Insp. Aureo Sanchez nagkanayon nga kinse ka mga establisamento partikular na niini ang mga representante sa mga pawnshops ug mga vital installations ang mitambong sa maong tigum diha sa barangay hall sa Pardo.
Pipila sa mga nanambong mga security officers ug managers sa maong mga establisamento aron paminawon ang pamaagi sa kampanya sa kapolisan batok sa nag-ung ong nga hulga sa mga tulis.
Si Supt. Pablo Labra ug Sr. Insp. Michael Anthony Bastes maoy nihatag og mga pagtulon-an alang sa mga nanambong kabahin sa mga pamaagi ug modus operandi sa mga tulisan base sa ilang mga kasinatian dinhi.
Gihisgutan mao ang mga pamaagi aron sa pagsugod palang mapakgang na dayon ang plano sa mga tulisan, kini mao ang target hardening sa mga establisamento.
Naglakip niini mao ang pagbutang og mga gwardiya, security camera, burglar alarms ug komunikasyon direkta sa kapolisan.
Samtang sa habig sa mga polis gihisgutan sa maong tigum ang papel sa mga polis diha sa ilang lugar, kini sama sa pagbutang og police visibility, pagpatrolya ug uban pa.
Giawhag usab ang mga establisamento sa paghatag og impormasyon ug feedbacks kabahin sa mga nanghitabong may kalambigitan sa krimen diha sa ilang mga dapit ngadto sa kapolisan aron maaksyunan dayon.
Gipakitaan usab og video footage sa nakuha sa security camera sa usa sa mga gitulis nga balay patantuhan dinhi sa dakbayan ang maong mga representante diin ilang nakita kung giunsa paghimo sa mga tulisan ang ilang operasyon ingon man ang ilang mga dagway.
Pipila na ka bulan ang nakalabay gitulis sa di momenus siyam ka mga armado og tag-as nga armas nga mga lalaki ang Oro Sugbu diha sa dalan Magallanes ug minilyon nga balor sa mga alahas ang nasakiyo.
Duha ka tawo ang nadakpan pipila ka oras human sa maong hitabo ug napasakaan na og kasong robbery with homicide.