Sama sa naandan malampusong napadangat ni Presidente Gloria Macapagal Arroyo ang iyang dul-an usa ka oras nga State of the Nation Address samtang ang mga militanteng pundok sa nasud nagkaguliyang sa ilang pagsaway niini.
Si Arroyo nagsuot og kolor pulang modernized Maria Clara gipakpakan og maayo sa mga nitambong sa SONA sa matag anunsyo niini sa iyang nahimo ug sa mga planong himuon sa nahabiling tuig sa termino.
Gitubag sa pangulo ang mga panawagan sa mga militante ug ubang magbabalaod kabahin sa pagtangtang na sa value added tax (VAT) sa pag-ingon nga dili kini mahimo.
Matud pa sa pangulo ang VAT mao karoy usa sa tinubdan sa pundo sa gobiyerno nga gigamit sa mga proyekto, imprastraktura, agrikultura, edukasyon sa mga kabus, ug uban pa.
Mipasabot ang pangulo nga kung wagtangon kini mas mosamot og kabug-at alang sa kinabag-ang Pilipino ilabi na sa mga kabus ang sitwasyon tungod kay mas mosaka ang inflation rate sa nasud, kini maoy gipangbayad sa utang sa abroad, nakapamenus sa inflation rate ug uban
Pinaagi sa VAT nakakuha ang gobiyerno og P86.568 bilyones, apan ang mga wala mouyon niini ilabi na ang mga naa sa oposisyon tungod kay imbes nga anha kuhaon sa VAT buot nilang tarungon sa gobiyerno ang koleksyon sa buhis.
Matud pa sa pangulo ang krisis gibati sa tibuok kalibutan bisan na sa mga labing adunahang nasud, apan ang gobiyerno naninguhang makakita og paagi aron mamenusan ang epekto niini dinhi sa nasud.
Giangkon ni Arroyo nga nakapaubos og maayo sa iyang popularidad ang iyang mga gihimong pamaagi pag-atubang sa global crisis dinhi sa nasud apan nasayod siyang mas daghan ug mas dako ang nahimo niini kung itandi sa kadaut nga gipasangil sa iyang mga tigsaway.